"Дьүөгэлиилэр" күрэс олус сэргэхтик ааста

Үрүҥ тунах ыһыахпыт күнүгэр, А.М. Алексеев аатынан култуура дьиэтигэр, авторскай проегым, "Дьүөгэлиилэр" күрэс буолан ааста. Дьүүллүүр сүбэнэн педагогическэй үлэ бэтэрээнэ, СӨ үөрэҕириитин туйгуна Оксана Гаврильевна Кривогорницына, С.З. Борисов аатынан Тыыллыма орто оскуолатын директоры үөрэх чааһыгар солбуйааччы Ксенофонтова Екатерина Николаевна уонна кини чугас дьүөгэтэ, А.М. Алексеев аатынан култуура дьиэтин үлэһитэ, Алексеева Татьяна Ивановна үлэлээтилэр.
Күрэскэ 3 пара дьүөгэлиилэр кыттыыны ыллылар. Бастакы нүөмэрдээх кыттааччылар Михайлова Галина уонна Матросова Галина, иккис нүөмэрдээх кыттааччылар Осипова Аксинья уонна Колесова Ольга, үһүс нүөмэрдээх кыттааччылар Пинигина Елена уонна Петрова Александра.
Күрэһи мин дьүөгэбинээн Бродникова Аграфеналыын ырыанан арыйдыбыт. Бастакы түһүмэх- бэйэни билиһиннэрии, иккис түһүмэх - бэйэ бэйэ туһанан боппуруостарга эппиэттээһин, үһүс түһүмэх кыргыттар талааннарын көрдөрдүлэр, манна үҥкүү, ырыа, сыанка көрөн көрөөччүлэр астыннылар, төрдүс түһүмэх-эрэллээх доҕор, манна биирдэрэ мээчиги быраҕар биирдэрэ ону ыаҕыйанан хабар, бэһис түһүмэххэ кыргыттар маанытык таҥнан хааман көрдөрдүлэр. Бу көрүҥнэр түмүктэринэн дьүүллүүр сүбэ анал ааттары уонна кыайыылааҕы быһаардылар.
"Кэрэ дьүөгэлиилэр" анал аат туттарылынна Петрова Александраҕа уонна Пинигина Еленаҕа
"Истиҥ дьүөгэлиилэр" анал аат туттарылынна Михайлова Галинаҕа уонна Матросова Галинаҕа
"Эрэллээх дьүөгэлиилэр" анал туттарылынна Осипова Аксиньяҕа уонна Колесова Ольгаҕа
Дьэ, уонна сүрүн кыайыылаахтар, "Бастыҥ дьүөгэлиилэр" буоллулар Михайлова Галина уонна Матросова Галина.
Бу күрэс спонсордара 1-кы Тыыллыма тыа сирин түөлбэтин олохтоох дьаһалтата, С.З. Борисов аатынан Тыыллыма орто оскуолата, нэһилиэкпит урбаанньыттара Ларионова Марфа Егоровна, Кривогорницына Мария Михайловна, түгэнинэн туһанан барҕа махталбын тириэрдэбин.
Күрэспитин култуура дьиэтин специалистара Никифоров Виталий, Винокуров Леонид ылбаҕай ырыаларынан кирэгэттилэр.
Бука бары кыттыыны ылбыт дьүөгэлиилэргэ, дьүүллүүр сүбэҕэ, көрөөччүлэргэ, култуура дьиэтин бары үлэһиттэригэр махтанабын.